今日嘅「親子小火龍頭龍頭紮作工作坊」已經圓滿結束啦！ 睇到現場每位家長同小朋友都超認真、超專心咁學習點樣紮小火龍，真係覺得今次活動特別有意義！

今次好榮幸邀請到 薄扶林村火龍會 總監蕭昆崙師傅、團隊嘅 Edmond 師傅、May 姐仲有師母落手落腳親自指導。由一條條平平無奇嘅竹篾開始，用自己嘅美感同創意，用紙膠帶，由一個「申」字開始，合力紥成咗最考功夫嘅「小火龍頭框架」！活動之後，家長同小朋友仲可以將框架帶返屋企，發揮無限想像力幫龍頭加埋啲裝飾，創作出獨一無二、充滿靈氣嘅火龍！

全個過程中，大朋友小朋友都化身成「紮作大師」，互相幫忙、默契十足。呢個不單止係溫馨嘅親子時光，更係將香港嘅非遺文化由上一代親手傳承畀下一代蕭師傅話：「創意其實先係最重要，大家都無見過龍，可以用自己嘅方法演繹：個口大啲？個角長啲？都係可以由你話事！」

「小火龍紮作」唔止係一項非遺手藝，更係今年週年演出《可不可以說》巨大「龍鬚糖龍」嘅前奏。透過今次體驗，大家都由外而內咁深度認識咗香港在地嘅火龍文化，大家覺得台上嘅龍鬚糖龍又應該係點㗎呢？

再次多謝蕭師傅同助手師傅嘅熱心教學，同埋每一位嚟支持同參與嘅大小朋友！

錯過咗今次工作坊？唔緊要！記得密切留意我哋嘅 Page，更多週年演出嘅精采活動同售票詳情好快就會發佈啦！